Hefteaz.info xəbər verir ki, hər zaman ölkədə hakimiyyətin apardığı repressiv metodlara qarşı çıxan Repressiya və İşgəncələr Əleyhinə Komitəsi bəyanat verib. Həmin bəyanatı sizə təqdim edirik: Repressiya və İşgəncələr Əleyhinə Komitənin
B Ə Y A N A TI
Təəssüflə qeyd olunmalıdır ki, Azərbaycan hakimiyyəti ona ünvanlanan çox saylı çağırış və tələblərə baxmayaraq dinc, günahsız insanlara qarşı repressiv siyasətini davam etdirir. İnsanlar heç bir əsas olmadan şərlənib həbs olunur. Ağır işgəncələrə məruz qalır və müəmmalı şəkildə qətlə yetirilir.
Aparılan araşdırmalar göstərir ki, ölkədə qorxu xofunun gücləndirilməsi, qisas, tamah və s. məqsədlər naminə son bir neçə ildə 100- lərlə şəxs hüquqi əsas olmadan həbs edilib. Xüsusi qəddarlıq və amansızlıqla işgəncələrə məruz qalıblar. ən azından 30- dan çox şəxs döyülərək və odlu silahla qətl yetirilib. Nardaran hadisələri, “Tərtər işi” və “Gəncə işi” ilə bağlı kütləvi şəkildə repressiyaya məruz qalanlar daha çox olub… Acınacaqlı haldır ki, hakimiyyətin vətəndaşlara qarşı amansız münasibəti dayanmadan davam etməkdədir.
May ayında Şəki rayon polis idarəsinə sağlam vəziyyətdə aparılan Qalib Məmmədov günün ikinci yarısı ordan ölü halında çıxarılıb. Onun başında və bədənini bir neçə hissəsində ağır xəsarət izləri olub. Amma işgəncə və qəsdən adam öldürmə faktı ört- basdır edilib. Dəfələrlə çağırış edilməsinə baxmayaraq Gəncə məhbusu Aydın Qurbanov vaxtında azadlığa buraxılıb normal müalicə olunmasına imkan verilməyib. O, həbs edilən zaman məruz qaldığı işgəncələrdən, baxımsız həbsxana şəraitindən, zəif tibbi xidmətdən bir neçə həftə öncə- 10 iyulda Penitensiar Xidmətin Müalicə Müəssisəsində dünyasını dəyişib.
Eyni zamanda məlum Gəncə hadisələri ilə bağlı həbs edilən zaman ağır işgəncələrə məruz qalmasına baxmayaraq işgəncə hallarının araşdırılması ilə bağlı təqsirləndirilən şəxslərin, valideynlərin və vəkillərin tələblərini republika baş prokurorluğu qulaq ardına vurur, bu yöndə hər hansı ədalətli araşdırma aparmır. Halbu ki, bəzi məhbusların bədənlərində işgəncənin izləri hələ də qalır. Tərtər hadisələrinə görə həbs olunmuş hərbçi Natiq Quluzadənin anası Bahar xanım oğluna qarşı edilən haqsızlıqlara, işgəncələrə dözməyərək bir neçə gün öncə vaxtsız vəfat edib. Mərhumənin dəfn və yas məclisində oğlunun iştirakına imkan verilməyib. Azərbaycan hakimiyyətinin ölkədə yaratdığı ağır sosial- iqtisadi durum, bərbad idarəçilik ucbatından Almaniyadan deport olunan, ali təhsilli ana Humay Mmmədova ölkəyə qayıtmaqdansa intihar etməyi tərcihə edərək öz həyatına son qoyub.
Hollandiyadan deport olunan Natiq İsbatov isə ölkəyə qayıdan kimi Avropadakı ictimai- siyasi fəaliyyətinə görə polisə müqavimət adı ilə şərlənərək 30 sutka inzibati həbs olunub. Keçən ilin oktyabr ayında ağır xəstə olan atasına baş çəkmək üçün Latviyadan Azərbaycana gələn Musavat fəalı, şərlənib həbs olunan Azad Həsənov heç bir əsas olmadan 9 aydır qondarma, saxta ittihamlarla həbsdə saxlanılır. Onun məhkəmə sorğularına aidiyyatı urumlar cavab vermir, məhkəmə prosesi bilərəkdən uzadılır, süründürməçiliy yol verilir. Azad Həsənov ona qarşı edilən ədalətsizliyə və haqsızlığa etiraz əlaməti olaraq 7 gündür ki, aclıq aksiyası keçirməyə məcbur olub.
DTK əməkdaşlarının korrupsiya əməllərini ifşa etdiyi üçün həbs olunan, jurnalist Polad Aslanov ağır cinayətdə ittiham olunur, amma istintaq orqanları bu günə qədər onun əməlində ortaya hər hansı ciddi fakt qoya bilməyib. Acınacaqlı haldır ki, republika baş prokurorluğu bu qanunsuzluq və zorakı hərəkətləri araşdırmaq əvəzinə həmin faktları dilə gətirən hüquq müdafiəçiləri, ictimai fəalları və jurnalistlərə təzyiq edir. Onlara rəsmi xəbərdarlıq edir. Repressiya və İşgəncələr Əleyhinə Komitə hakimiyyətdə vətəndaşlara qarşı həyata keçirilən repressiya, qanunsuz həbslər və işgəncə hallarını durdurmağı, səbəbkarların məsuliyyətə cəlb olunmasını tələb edir.
29 iyul, Bakı şəhəri
Hefteaz.info
